قواعد مهمه قبل ان تبدا في اعمال السباكه

السباااكه

عشر حجات مهمه جدا تاخد بالك منها قبل ما تبدا تاسيس السباكه  :

1- اهم حاجه في السباكه و اول حاجه بيشتغل علي اساسها السباك هو الشيرب (و هو ضبط منسوب المواسير اللي علي اساسها بتاع السيراميك بيشتغل ) لو السباك خد شيرب غلط او ماظبطش الشيرب بتاعه بيحصل مشاكل كتيره بعد كده في منسوب السيراميك وارتفاع الخلاطات و الاحواض .

2- فيه ناس ماتعرفش انك ممكن تعمل خلاط للقاعده و يكون سخن و بارد و الموضوع مش بيكلف كتير .

3- ماتنساش بعد ما السباك يخلص شغله تجيب الشركه بتاعه المواسير تعمل اختبار ضغط المواسير و تديك ضمان عشان لو فيه مشاكل تظهر و تتحل قبل السيراميك .

4- قرر قبل ما تبدا في التاسيس نوع الحوض اللي هتجيبه للحمام سواء هيبقي عمود او ركبه معلَقه او وحده لان كل حاجه ليها تاسيس مختلف .

5- عزل الحمام مهم جدا .

6- يستحسن تجيب البانيو في مرحله التاسيس حتي لو هيركب بعد السيراميك عشان تحدد مكان الصرف بتاعه و كمان مكان الخلاط و كمان لو عندك خلاط دفن هاته في مرحله التاسيس .

7- قرر هتعمل خلاط حوض المطبخ خارج من الحيطه ولا شجره ( يعني طالعه من الرخامه او الحوض ) عشان كل واحد ليه تاسيس مختلف , ولو هتعمل فلتر تحت حوض المطبخ اسسله من الاول .

8- ممنوع التكسير في أي عامود.. وبعد ما السباك يخلص لازم تتاكد ان كل المواسير داخله كلها جوا الحائط ( يعني مفيش ماسوره بارزه من الحائط ) عشان لو طالعه من الحائط صنايعي السيراميك هيضطر يربي مونه كتير فالجانب كله و ده ممكن يضيق الحمام او المطبخ .

9- حدد السخانات هتتعمل غاز ولا كهرباء عشان بتوع الغاز ليهم شروط معينه ف تاسيس سخان الغاز ( الارتفاعات بتختلف فالحالتين ) .

10- اعمل صرف للتكييفات ( لو حسيت الموضوع مكلف علي الاقل اعمل صرف للغرف اللي متاكد انك هتحط فيها تكييف ) .

............................