اهم قواعد تشطيب بيتك

 قواعد التشطيب 

 = مينشن لصاحبك أو صاحبتك اللي بيجهزوا بيتهم. 

1 - و أنت بتأسس البيت لازم يكون معاك رسم كهربا و سباكة قبل ما تبدأ فيهم.

 2 - أوعى تخلي صنايعي يشتريلك بضاعة. 

3 - و أنت بتعمل الكهربا لازم تبقى فاهم فيها أو تجيب حد فاهم يشرف و يستلم من الكهربائي.

 4 - أوعى تِسلم لصنايعي " متخلهوش يحُط التاتش بتاعه "

5 - يستحسن الكهربا متبقاش فيها بواطات.

 6 - متتخيلش إن اختيار النجف و وحدات الإضاءة سهل " لازم تركز في زواية انتشار الضوء و لونه ".

 7 - استخدموا أكتر من نوع و وحدة إضاءة. 

8 - مش لازم مهندس الديكور يكون ست " ممكن يبقى ست أو راجل أو كائن فضائي " المهم الضمير و الإلتزام. 

9 - لازم .. لازم .. لازم، تجيب شركة تكبس شغل السباكة و تديك ضمان مدى الحياة. 

10 - البساطة أحلى في كل حاجة " ألوان - فرش - سجاد - ستائر - .. ".

 11 - لو مش عاوزين بساطة يبقى لازم تجيبوا مهندس ديكور علشان يمشي كل حاجة مع بعض. 

12 - النبيتي و البيج مش شرط يكونوا أحسن ألوان في البيوت. 

13 - مفيش حاجة أسمها السرير تحت الشباك. 

14 - متحطوش السرير في وش باب الأوضة.

 15 - ركبوا وحدة إضاءة جمب مراية الحمام. 

16 - الصالون المدهب مش دايماً وحش. 

17 - نقولها تاني متخليش صنايعي يشتريلك بضاعة. 

18 - متلزقوش الفرش في الحيطان سيبوا بينهم مسافة علشان متحسوش إن الحاجة مرصوصة. 

19 - الموكيت مش بيلم حشرات " الموضوع موضوع نظافة شخصية ".

 20 - لازم تجيبوا لوحات و قطع فنية " بتبين جمال البيت ". 

21 - متكتروش في الفرش " سيبوا مسافة كافية بين القطع ". 

22 - مهم أوي اختيار ألوان الفرش قبل ما تدهنوا البيت.

 23 - لو البيت محندق بلاش تشتروا الفرش أحجامه كبيرة. 

24 - لو عاوزين شغل جبس في الحمام ممكن تستخدموا الجبسومبورد الأخضر. 

25 - و النبي أوعى تخلي صنايعي يشتريلك بضاعة. 

26 - الكلاسيك دمه مش تقيل دايماً. 

27 - مهندس الديكور هو في الحقيقة بيوفرلك فلوسك. 

28 - حطوا زرع في البيت. 

29 - لازم تطبقوا قاعدة مثلث الحركة في المطبخ.